सेतो मच्छिन्द्रनाथको रथजात्रा सुरु
चैत १५ गते । आर्यालोकितेश्वरको मूर्ति अर्थात् सेतो मच्छिन्द्रनाथको रथजात्रा आजबाट सुरु भएको छ । आर्यालोकितेश्वर र करुणामयको नामबाट पनि चिनिने सेतो मच्छिन्द्रनाथको जात्रा हरेक वर्ष चैत शुक्ल अष्टमीको दिनदेखि मनाउने चलन छ ।
आज रथयात्रा घण्टा घरबाट असन चोक ल्याइँदैछ । सेतो मच्छिन्द्रनाथलाई विधिवत् रूपमा पुजारीहरूले निकालेपछि रथमा राखेर रथलाई जमल, रत्नपार्क, भोटाहिटी हुँदै आज असन पुर्याइन्छ । त्यस्तै भोलि असन, बालकुमारी, केल टोल, इन्द्रचोक मखन हुँदै हनुमान ढोका र १७ गते हनुमानढोका, चिंकमुगल, जैशीदेवल, ज्याबहाल हुँदै रथलाई लगन पुर्याइन्छ ।
यसैगरी, चैत १८ गते लगन आमा रुख परिक्रमा, चैत १९ गते लगन, ज्याबहाल, द्यः लं, युतुननी, कोहिति भीमसेन थान, मरु, यतखा, नरदेवी, किलागल, भेडासिङ, केलटोल हुँदै मच्छिन्द्रबहालसम्म पुर्याइन्छ ।
१० औँ शताब्दीमा मल्लयुगमा सेतो मच्छिन्द्रनाथको मन्दिरनिर्माण गरिएको विश्वास छ ।
